គ.ជ.ប ពិចារណាពន្យារពេលចុះឈ្មោះបោះឆ្នោតដោយសារទឹកជំនន់
មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) កំពុងពិនិត្យពន្យារពេលវេលាចុះឈ្មោះបោះឆ្នោត នៅសាលាឃុំ-សង្កាត់មួយចំនួនតាមខេត្តជាប់ព្រំដែនកម្ពុជា-ថៃ ដែលជួបគ្រោះទឹកជំនន់មិនអាចបើកទ្វារឲ្យពលរដ្ឋពិនិត្យ ឬចុះឈ្មោះបោះឆ្នោតឆ្នាំ២០១៣ បាន។
មន្ត្រី គ.ជ.ប អះអាងថា ការចុះឈ្មោះប៉ុន្មានថ្ងៃមកនេះ មានអ្នកចុះឈ្មោះថ្មីនៅទូទាំងប្រទេសជាង ១ម៉ឺននាក់។ ក្នុងនោះមានឃុំ-សង្កាត់ជាង ១.៣០០ឃុំ-សង្កាត់ ក្នុងចំណោមឃុំ-សង្កាត់ ១.៦៣៣ បានបើកឲ្យដំណើរការធម្មតា។
កាលបរិច្ឆេទនៃការពិនិត្យបញ្ជីឈ្មោះ និងការចុះឈ្មោះបោះឆ្នោតថ្មី ឬធ្វើបច្ចុប្បន្នភាពបញ្ជីឈ្មោះបោះឆ្នោតឆ្នាំ២០១៣ មានរយៈពេល ២០ថ្ងៃ គឺចាប់ផ្ដើមពីថ្ងៃទី១ ដល់ថ្ងៃទី២០ ខែតុលា។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត បានឲ្យដឹងនៅថ្ងៃអង្គារ ទី៨ ខែតុលា ថា គិតមកទល់ពេលនេះ មានអ្នកចុះឈ្មោះបោះឆ្នោតថ្មីជាង ១ម៉ឺននាក់។
លោកបន្តថា តាមគម្រោងអាចមានអ្នកចុះឈ្មោះថ្មីជាង ៣០ម៉ឺននាក់ និងមានគម្រោងលុបឈ្មោះស្ទួន ឬឈ្មោះខ្មោចចេញពីបញ្ជីបោះឆ្នោតជិត ២០ម៉ឺននាក់ក្នុងឆ្នាំ២០១៣នេះ៖ «ឃើញថា ឃុំសង្កាត់ជាង ១០០ ជាពិសេសនៅតាមព្រំដែនកម្ពុជា-ថៃ និងនៅតាមដងទន្លេមេគង្គនៅជួបបញ្ហាច្រើនដែលរំខានដល់ការពិនិត្យ និងការចុះឈ្មោះបោះឆ្នោត ទោះបីជាគណៈកម្មការក្រុមប្រឹក្សាឃុំសង្កាត់ និងស្មៀនបានចល័តទៅទីមានសុវត្ថិភាពក៏ដោយ។ ក៏ប៉ុន្តែប្រជាពលរដ្ឋមួយចំនួនគាត់ពិបាកក្នុងការធ្វើដំណើរ ហើយពេលនេះ គ.ជ.ប កំពុងពិនិត្យមើលស្ថានភាពជាក់ស្ដែង ដើម្បីនឹងបន្ថែមរយៈពេលជូននៅតាមឃុំសង្កាត់ណាដែលជាប់ការរាំង ស្ទះនេះ»។…
ដែន អយុធ្យា
http://www.rfa.org/khmer/news/politics/voter-registration-considered-to-delay-10082013062646.html
